ກອງປະຊຸມໃຫຍ່ຜູ້ແທນອົງຄະນະພັກເມືອງປາກແບງຄັ້ງທີ XIII ພາຍຫຼັງທີ່ດຳເນີນມາເປັນເວລາສອງວັນ ມາໃນຕອນບ່າຍວັນທີ 13 ພະຈິກ 2019 ກໍໄດ້ອັດລົງດ້ວຍຜົນສຳເລັດອັນຈົບງາມຢູ່ທີ່ສະໂມສອນຂອງເມືອງ ໂດຍພາຍໃຕ້ການເປັນປະທານຂອງສະຫາຍ ຄຳເຜີຍ ງອນວັນຄຳ ເລຂາພັກເມືອງ ເຈົ້າເມືອງໆປາກແບງ. ການເປັນກຽດເຂົ້າຮ່ວມມີສະຫາຍ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງອຸດົມໄຊ, ສະຫາຍ ພອນສະຫວັນ ພັນທະວິຈິດ ຄະນະປະຈຳພັກແຂວງ ຫົວໜ້າພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວ ມີອາດີດການນຳເມືອງ, ພະນັກງານປະຕິວັດອາວຸໂສ, ຜູ້ຊົງຄຸນວຸທິ, ພ້ອມດ້ວຍ ແຂກຖືກເຊີນຈາກຂັ້ນແຂວງ, ເມືອງໃກ້ຄຽງ ແລະ ບັນດາສະຫາຍຜູ້ແທນສົມບູນ 88 ສະຫາຍ, ຍິງ 4ສະຫາຍ ເປັນຕົວແທນໃຫ້ແກ່ສະມາຊິກພັກ ຈຳນວນ 1.022ສະຫາຍ, ຍິງ 181 ສະຫາຍ ເຂົ້າຮ່ວມຢ່າງພ້ອມພຽງ.

ກອງປະຊຸມ ໄດ້ຍົກສູງຄວາມຮັບຜິດຊອບ, ສຸມສະຕິປັນຍາຂອງຕົນເຂົ້າໃນການຄົ້ນຄວ້າ ປະ ກອບຄໍາເຫັນຕໍ່ກອງປະຊຸມ ຢ່າງກົງໄປກົງມາ, ເຊິ່ງໄດ້ເຮັດໃຫ້ກອງປະຊຸມດຳເນີນໄປດ້ວຍບັນຍາ ກາດຟົດຟື້ນ ແລະປະສົບຜົນສຳເລັດຢ່າງສະຫງ່າງາມ ຕາມຈຸດປະສົງ ແລະ ລະດັບຄາດໝາຍ ທີ່ກອງປະຊຸມໄດ້ກຳນົດໄວ້. ກອງປະຊຸມໃຫຍ່ອົງຄະນະພັກເມືອງປາກແບງ ຄັ້ງທີ XIII ໄດ້ລົງປະຊາມະຕິ ເປັນເອກະສັນຮັບຮອງເອົາບັນດາເນື້ອໃນສໍາຄັນຄື: ພ້ອມກັນຄົ້ນຄ້ວາ ແລະ ປະກອບຄໍາເຫັນ ໃສ່ບົດລາຍງານການເມືອງ, ແຜນພັດທະນາເສດຖະກິດ-ສັງຄົມ 5 ປີທິດທາງລວມ ແລະ ຄາດໝາຍສູ້ຊົນຕົ້ນຕໍ, ວຽກງານຈຸດສຸມແຕ່ລະດ້ານ ແລະ ບົດສໍາຫຼວດການນໍາພາລວມຂອງຄະນະບໍລິຫານງານ ພັກເມືອງ ຊຸດທີ XII.ໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນໃນການຊີ້ນໍາ-ນໍາພາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XII. ພ້ອມນີ້ກອງປະຊຸມຍັງໄດ້ເປັນເອກະສັນຮັບຮອງເອົາທິດທາງລວມ ແລະຄາດໝາຍສູ້ຊົນຕົ້ນຕໍ, ວຽກງານຈຸດສຸມແຕ່ລະດ້ານ 5 ປີ (2020-2024).

ກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະບໍລິຫານງານພັກເມືອງປາກແບງ ຊຸດທີ XIII ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງແລະສອດຄ່ອງກັບມາດຖານເງື່ອນໄຂທີ່ກຳນົດໄວ້, ເຊິ່ງມີຜູ້ສະໝັກເລືອກຕັ້ງທັງໝົດ 25 ສະຫາຍ,ຍິງ 3 ສະຫາຍ, ເລືອກໄດ້ 21 ສະຫາຍ,ຍິງ 3 ສະຫາຍ.ກອງປະຊຸມຄັ້ງປະຖົມມະລຶກຂອງຄະນະບໍລິຫານງານພັກເມືອງປາກແບງຄັ້ງທີXIII ໄດ້ເປັນເອກະສັນ ເລືອກຕັ້ງເອົາຄະນະປະຈຳພັກເມືອງ 7 ສະຫາຍ, ຍິງ1 ສະຫາຍ,ເລືອກຕັ້ງເອົາເລຂາ ແລະ ຮອງເລຂາຄະນະບໍລິຫານງານພັກເມືອງປາກແບງ ສະໄໝທີ XIII ຄື: ເລືອກເອົາສະຫາຍ ຄຳສະພອນ ໄຊຍະວົງເປັນເລຂາພັກເມືອງ, ສະຫາຍຄຳດີ ກຸນໄຊຍະທຳ ແລະ ສະຫາຍ ອິນແປງ ປັນຍາທອງເປັນຮອງເລຂາພັກເມືອງ, ເລືອກຕັ້ງເອົາປະທານ ແລະ ຮອງປະທານກວດກາພັກ, ເລືອກເອົາ ສະຫາຍ ອິນແປງ ປັນຍາທອງເປັນປະທານກວດກາ,ສະຫາຍລື ລັດຕະນະສັກ ແລະ ສະຫາຍສີໄວ ແສງດວງໃຈ ເປັນຮອງປະທານກວດກາ.ກອງປະຊຸມໃຫ່ຍໄດ້ເປັນເອກະສັນປ່ອນບັດເລືອກຕັ້ງເອົາຜູ້ແທນສົມບຸນ ໄປຮ່ວມກອງປະຊຸມໃຫ່ຍ ອົງຄະນະພັກແຂວງ ຄັ້ງທີ IX ຈຳນວນ 18 ສະຫາຍ, ຍິງ 2ສະຫາຍ.
ຕອນທ້າຍກອງປະຊຸມ ໄດ້ຮັບຟັງການໂອ້ລົມຂອງສະຫາຍ ປອຄຳພັນ ເຜີຍຍະວົງ ກຳມະການສູນກາງພັກ, ເລຂາຄະບໍລິຫານງານພັກແຂວງ,ເຈົ້າແຂວງອຸດົມໄຊ. ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ຄະນະພັກຊຸດທີ XII ທີ່ໄດ້ຊີ້ນຳ-ນຳພາພະນັກງານ, ສະມາຊິກພັກ, ປະຊາຊົນບັນດາເຜົ່າ ປະຕິບັດໜ້າທີ່ການເມືອງສາມາດຍາດໄດ້ໄຊຊະນະ ແລະມີຜົນສຳເລັດໃນຫຼາຍດ້ານ ພ້ອມກັນນີ້ ສະຫາຍຍັງໄດ້ສະແດງຄວາມເປັນຫ່ວງ ເປັນໄຍຕໍ່ບັນຫາທີ່ຄົງຄ້າງ ເຊິ່ງໄດ້ຮຽກຮ້ອງໃຫ້ຄະນະພັກຊຸດໃໝ່ ຕ້ອງໄດ້ສືບຕໍ່ປັບປຸງແກ້ໄຂ ພ້ອມທັງໃຫ້ທິດຊີ້ນໍາແຕ່ລະດ້ານໃນທາງທີ່ສ້າງສັນ, ມີຄວາມເຊື່ອໝັ້ນຕໍ່ຄະນະພັກຊຸດໃໝ່ທີ່ຈະສືບຕໍ່ ຊີ້ນຳ-ນຳພາ ຈັດຕັ້ງປະຕິບັດມະຕິກອງປະຊຸມໃຫຍ່ອົງຄະນະພັກເມືອງປາກແບງຄັ້ງທີ XIIIໃຫ້ມີຜົນສຳເລັດຍິ່ງໃຫຍ່ກ່ວາເກົ່າ.
ກອງປະຊຸມໃຫຍ່ໄດ້ຮຽກຮ້ອງມາຍັງຄະນະບໍລິຫານງານພັກເມືອງຊຸດໃໝ່, ຄະນະພັກທຸກຂັ້ນ, ສະມາຊິກພັກ, ພະນັກງານລັດຖະກອນ, ພະນັກງານນັກຮົບ ແລະ ປະຊາຊົນບັນດາເຜົ່າທຸກຊັ້ນຄົນພາຍໃນເມືອງ ຈົ່ງໄດ້ເຊີດຊູຄວາມສາມະຄີ ເປັນຈິດໜຶ່ງໃຈດຽວຢູ່ອ້ອມຂ້າງຄະນະບໍລິຫານງານພັກເມືອງຊຸດທີ XIII, ຈົ່ງພ້ອມກັນເສີມຂະຫຍາຍມູນເຊື້ອຮັກຊາດ ແລະ ຈິດໃຈເປັນເອກະລາດ, ເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ຕັ້ງໜ້າປະຕິບັດຄາດໝາຍທີ່ກອງປະຊຸມຄັ້ງນີ້ໄດ້ວາງອອກ ໃຫ້ປະກົດຜົນເປັນຈິງ. ທັງໝົດນີ້ກໍ່ເພື່ອສ້າງທ່ວງທ່າ ແລະ ກຳລັງແຮງສັງລວມໃໝ່ ເພື່ອນຳເອົາຄວາມຮັ່ງມີຜາສຸກມາໃຫ້ປະຊາຊົນບັນດາເຜົ່າ ພາຍໃນເມືອງປາກແບງພວກເຮົາກ້າວຂຶ້ນຢ່າງບໍ່ຢຸດຢັ້ງ.

Leave a Reply