ກອງປະຊຸມ ຄົບຄະນະບໍລິຫານງານພັກແຂວງ ເປີດກວ້າງ ຄັ້ງທີ 10 ສະໄຫມທີ VIII ຂອງແຂວງອຸດົມໄຊ ເປີດຂຶ້ນໃນຕອນເຊົ້າວັນທິີ 11 ກໍລະກົດ 2019 ຢູ່ທີ່ຫ້ອງປະຊຸມ ຫ້ອງວ່າການແຂວງອຸດົມໄຊ ໂດຍການເປັນປະທານຂອງທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ,ເລຂາພັກແຂວງ,ເຈົ້າແຂວງອຸດົມໄຊ,ມີບັນດາຄະນະປະຈຳພັກແຂວງ,ກຳມະການພັກແຂວງ,ເລຂາພັກເມືອງ,ເຈົ້າເມືອງ ແລະ ຂະແໜງການກ່ຽວຂ້ອງເຂົ້າຮ່ວມ.

  ໃນກອງປະຊຸມ ໄດ້ສະຫຼຸບຕີລາຄາຜົນການເຄື່ອນໄຫວຈັດຕັ້ງປະຕິບັດວຽກງານ ໃນຫຼາຍດ້ານ ໃນໄລຍະ 6 ເດືອນ ຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2019 ພ້ອມທັງຍົກເອົາບາງບັນຫາ ຂຶ້ນມາເພື່ອປຶກສາຫາລື ແລກປ່ຽນຄວາມຄິດເຫັນໃນການຊອກຫາແນວທາງປັບປຸງແກ້ໄຂ ບັນຫາທີ່ຍັງຄົງຄ້າງ ໂດຍສະເພາະແມ່ນວຽກງານ ການຊີ້ນຳ – ນຳພາ ຂອງຄະນະບໍລິຫານງານພັກແຂວງ,ການຈັດຕັ້ງປະຕິບັດແຜນພັດທະນາເສດຖະກິດ ສັງຄົມ,ການຈັດຕັ້ງປະຕິບັດແຜນງົບປະມານແຫ່ງລັດ. ລວມທັງນຳເອົາເນື້ອໃນເອກະສານທີ່ສຳຄັນຈຳນວນໜຶ່ງ ມາເຜີຍແຜ່ ໃຫ້ແຕ່ລະພາກ ສ່ວນຮັບຮູ້ ແລະ ພ້ອມກັນສະຫຼຸບຕີລາຄາ ເຊັ່ນ ຮ່າງນິຕິກໍາ,ຂໍ້ກຳນົດ ແລະ ການປະເມີນລາຄ່າທີ່ດິນ ຂອງແຕ່ລະປະເພດ ໃນທົ່ວແຂວງອຸດົມໄຊ,ຮ່າງນິຕິກຳ ວ່າດ້ວຍການຄຸ້ມຄອງປ່າຊາທຳມະຊາດ,ຮ່າງຄຳສັ່ງ ວ່າດ້ວຍການຄຸ້ມຄອງ,ປົກປັກຮັກສາ ແລະ ພັດ ທະນາປ່າໄມ້ເຂດພູໂທ້, ຮ່າງບົດລາຍງານການເມືອງ ຂອງກອງປະຊຸມໃຫຍ່ອົງຄະນະພັກແຂວງ ອຸດົມໄຊ ຄັ້ງທີ IX, ຮ່າງແຜນພັດທະນາເສດຖະກິດ ສັງຄົມ 5 ປີ 2021-2025 ແລະ ຮ່າງມະຕິກອງປະຊຸມ ຄົບຄະນະບໍລິຫານງານ ພັກແຂວງເປີດກວ້າງ ຄັ້ງທີ 10 ສະໄຫມທີ VIII. ນອກນັ້ນ ຍັງໄດ້ນຳເອົາມະຕິ 8 ຂອງສູນກາງພັກ ສະໄຫມທີ X ມາເຜີຍແຜ່ ແລະ ເຊື່ອມຊຶມ ເພື່ອໃຫ້ທຸກພາກສ່ວນ ນໍາໄປຈັດຕັ້ງຜັນຂະຫຍາຍ ໃຫ້ປະກົດຜົນເປັນຈິງ ຕື່ມອີກ.

ກອງປະຊຸມດັ່ງກ່າວ ຈະໄດ້ດໍາເນີນໄປເປັນເວລາ 2 ວັນເຕັມ ຄື ວັນທີ 11-12 ກໍລະກົດ 2019 ນີ້ ຈຶ່ງຈະສຳເລັດ.