ຕອນແລງວັນທີ 12 ພຶດສະພາ 2020 ນີ້ ຢູ່ທີ່ຫ້ອງປະຊຸມ ຫ້ອງວ່າການແຂວງອຸດົມໄຊ ໄດ້ມີພິທີເຊັນສັນຍາຮັບເຫມົາ ການສະໜອງເຟີນີເຈີ ໂຕະ,ຕັ່ງ ເຂົ້າສະໂມສອນໃຫຍ່ຂອງແຂວງອຸດົມໄຊ ລະຫວ່າງ ຫ້ອງວ່າການແຂວງອຸດົມໄຊ ເຈົ້າຂອງໂຄງການ ແລະ ໂຮງງານລາວເຊິນ ປຸງແຕ່ງໄມ້ສຳ ເລັດຮູບຄົບວົງຈອນ ຈຳກັດຜູ້ດຽວ

ຜູ້ຮັບເຫມົາ ຂຶ້ນ ໂດຍການເຂົ້າຮ່ວມຂອງທ່ານ ນາງ ຈັນທະລາ ໄຊບຸນເຮືອງ ຮັກສາການຫົວໜ້າຫ້ອງວ່າການແຂວງອຸດົມໄຊ,ທ່ານ ຫຸມພັນ ໂກສະດາ ຮອງຫົວໜ້າຫ້ອງວ່າການ ແຂວງອຸດົມໄຊ ທັງເປັນຫົວໜ້າຄະນະຮັບຜິດຊອບຄຸ້ມຄອງການຈັດຊື້ເຟີນີເຈີ,ທ່ານ ສົມເພັດ ລາວເຊິນ ອໍານວຍການໂຮງງານລາວເຊິນ ປຸງແຕ່ງໄມ້ສໍາເລັດຮູບຄົບວົງຈອນ ຈໍາກັດຜູ້ດຽວ ຕະຫຼອດຮອດພະນັກງານ ແລະ ວິຊາການ ທັງສອງຝ່າຍ.

  ການຈັດຊື້ເຟີນີເຈີ ໂດຍສະເພາະແມ່ນ ໂຕະ ແລະ ຕັ່ງ ເຂົ້າໃສ່ສະໂມສອນໃຫຍ່ຂອງແຂວງອຸດົມໄຊ ໃນຄັ້ງນີ້ ກໍເພື່ອເປັນການປັບປຸງ,ກະກຽມ ໃສ່ການດໍາເນີນກອງປະຊຸມໃຫຍ່ອົງຄະນະພັກແຂວງ ຄັ້ງທີ 9 ເຊິ່ງຈະໄດ້ຈັດຂຶ້ນໃນ ເດືອນ ກໍລະກົດ 2020 ນີ້ ທັງເຮັດໃຫ້ສະໂມສອນຂອງແຂວງ ມີຄວາມສວຍງາມ,ມີຊຸດເຟີນີເຈີ ທີ່ດີ,ມີຄຸນນະພາບ ແລະ ສາມາດຮັບຮອງໃນການຈັດກອງປະຊຸມ,ມິດຕິງ ແລະ ກິດຈະກໍາອື່ນໆ ໄດ້ຢ່າງສະດວກສະບາຍ. ໃນພິທີແມ່ນໄດ້ຮັບຟັງການຜ່ານຮ່າງສັນຍາຮັບເຫມົາ ລະຫວ່າງ 2 ຝ່າຍ ຄື ຫ້ອງວ່າການແຂວງອຸດົມໄຊ ເຊິ່ງເປັນເຈົ້າຂອງໂຄງການ ແລະ ໂຮງງານລາຍເຊິນ ປຸງແຕ່ງໄມ້ສຳເລັດຮູບຄົບວົງຈອນ ຈຳກັດຜູ້ດຽວ ຜູ້ຮັບເຫມົາ ເຊິ່ງປະ ກອບມີທັງຫມົດ 18 ມາດຕາ ໃນນັ້ນ ແມ່ນໄດ້ກຳນົດ ຈຸດປະສົງ,ເປົ້າຫມາຍ ຢ່າງລະອຽດ ໃນນັ້ນ ມີໂຕະສະເພາະປະທານ ຈຳນວນ1 ໜ່ວຍ ເປັນໄມ້ດູ່ ຂະຫນາດ 60x210x80 ຊັງຕີແມັດ,ຕັ່ງໄມ້ດູ່ ມີບ່ອນວາງແຂນ,ມີນວມ ຈຳນວນ 3 ໜ່ວຍ,ໂຕະຄະນະປະຈຳພັກແຂວງ 18 ໜ່ວຍ ເປັນໄມ້ສັກຂະຫນາດ 60x140x80 ຊັງຕີແມັດ,ຕັ່ງໄມ້ສັກ ມີບ່ອນວາງແຂນ,ມີນວມ ຈຳນວນ 36ໜ່ວຍ,ໂຕະຜູ້ແທນກອງປະຊຸມ ເປັນແກນໄມ້ສັກ ຂະຫນາດ 50x140x75 ຊັງຕີແມັດ, ຈຳນວນ 181 ໜ່ວຍ ແລະ ຕັ່ງ ແກນໄມ້ສັກທົ່ວໄປ ຈຳນວນ 362 ໜ່ວຍ ລວມໂຕະທັງຫມົດ ຈໍານວນ 200 ໜ່ວຍ ແລະ ຕັ່ງ 401 ໜ່ວຍ ລວມເປັນມູນຄ່າທັງຫມົດ 465,400,000 ກີບ. ກໍານົດສ້າງທັງຫມົດ 2 ເດືອນ ນັບຕັ້ງແຕ່ວັນທີ 13 ພຶດສະພາເປັນຕົ້ນໄປ. ສ່ວນການຊໍາລະແມ່ນແບ່ງອອກເປັນ 2 ໄລຍະ ຄືປີ 2020 ນີ້ ເຊິ່ງໄລຍະທຳອິດນີ້ ແມ່ນຈະຈ່າຍ ພາຍຫຼັງໄດ້ຜ່ານການຢັ້ງຢືນຈາກບັນ ດາຫນ້າວຽກຈາກຄະນະກຳມະການທີ່ກ່ຽວຂ້ອງ ສຳເລັດ 50% ແລະ 100%ໃນຈໍານວນ 372 ລ້ານກີບ ແລະ ໄລຍະທີ 2 ແມ່ນຈະຊຳລະໃນປີ 2021 ໃນຈຳນວນ 93 ລ້ານ 4 ແສນກີບ. ກໍານົດການຮັບປະກັນ ເຟີນີເຈີທັງຫມົດ ແມ່ນ1 ປີ ນັບຕັ້ງແຕ່ໄດ້ມີການມອບ ຮັບກັນຢ່າງເປັນທາງການ. ຈາກນັ້ນ ທັງສອງຝ່າຍ ກໍໄດ້ລົງນາມໃນບົດບັນທຶກດັ່ງກ່າວ ເຊິ່ງຕາງໜ້າຝ່າຍເຈົ້າຂອງໂຄງ ການ ຄື ຫ້ອງວ່າການແຂວງອຸດົມໄຊ ແມ່ນທ່ານ ຫຸມພັນ ໂກສະດາ ຮອງຫົວໜ້າຫ້ອງວ່າການແຂວງ,ທັງເປັນຫົວໜ້າຄະນະຮັບຜິດຊອບຄຸ້ມຄອງການຈັດຊື້ເຟີນີເຈີ ແລະ ຝ່າຍໂຮງງານລາວເຊິນ ປຸງແຕ່ງໄມ້ສຳເລັດຮູບ ຄົບວົງຈອນ ຈຳກັດຜູ້ດຽວ ແມ່ນທ່ານ ສົມເພັດ ລາວເຊິງ ອໍານວຍການໂຮງ ງານດັ່ງກ່າວ ໂດຍມີຜູ້ເຂົ້າຮ່ວມທັງສອງຝ່າຍ ເປັນສັກຂີພິຍານ.

ຂ່າວ: ຄານມະນີ ຮຽນດໍຈັນ