ກອງປະຊຸມຄົບຄະນະບໍລິຫານງານພັກແຂວງອຸດົມໄຊ ເປີດກວ້າງຄັ້ງທີ 13 ສະໄຫມທີ VIII ໄດ້ຈັດຂຶ້ນໃນລະຫວ່າງວັນທີ 3-4 ມິຖຸນາ 2020 ນີ້ ຢູ່ທີ່ຫ້ອງປະຊຸມ ຫ້ອງວ່າການແຂວງອຸດົມໄຊ ໂດຍການເປັນປະທານຂອງທ່ານ ປອ ຄຳພັນ ເຜີຍຍະວົງ ກໍາມະການສູນກາງພັກ,ເລຂາພັກແຂວງ,ເຈົ້າແຂວງ ອຸດົມໄຊ,ມີບັນດາຄະນະປະຈຳພັກແຂວງ,ກຳມະການພັກແຂວງ,ເລຂາພັກເມືອງ,ເຈົ້າ ເມືອງ ແລະ ພະແນກການອ້ອມຂ້າງແຂວງເຂົ້າຮ່ວມ.

  ການດຳເນີນກອງປະຊຸມໃນຄັ້ງນີ້ ກໍເພື່ອສະຫຼຸບຕີລາຄາ,ຖອດຖອນບົດຮຽນ ການເຄື່ອນໄຫວວຽກງານແຕ່ລະດ້ານ ຂອງແຂວງ ທີ່ໄດ້ຈັດຕັ້ງປະຕິບັດມາເປັນໄລຍະເວລາ 6 ເດືອນ ໂດຍແນ່ໃສ່ໃນການຊອກຫາຈຸດດີ,ຜົນງານ,ຈຸດອ່ອນ,ຂໍ້ຄົງຄ້າງຕ່າງ ແລະ ພ້ອມກັນຊອກຫາແນວທາງປັບປຸງແກ້ໄຂໃນຕໍ່ໜ້າ ຕາມທິດທາງແຜນການ ທັງໄລະຍະສັ້ນ ກໍຄື 6 ເດືອນທ້າຍປີ ແລະ ໄລຍະຍາວ 5 ປີ,ເຮັດໃຫ້ແຂວງອຸດົມໄຊ ໄດ້ຮັບການພັດທະນາຢ່າງເປັນລະບົບ,ຕໍ່ເນື່ອງ ທັງດ້ານເສດຖະກິດ - ສັງຄົມ ແລະ ອື່ນໆ ທັງເປັນການຫ້າງຫາກະກຽມເນື້່ອໃນ ໃນການດໍາເນີນກອງປະຊຸມໃຫຍ່ອົງຄະນະພັກແຂວງ ຄັ້ງທີ IX ທີ່ຈະໄດ້ຈັດຂຶ້ນໃນມໍ່ໆນີ້ ໃຫ້ມີຄວາມສົມບູນຄົບຖ້ວນ.

  ໃນກອງປະຊຸມແມ່ນໄດ້ຮັບຟັງການສະຫຼຸບ ການເຄື່ອນໄຫວວຽກງານແຕ່ລະດ້ານ ໂດຍສະເພາະແມ່ນ ການຈັດຕັ້ງປະຕິບັດແຜນພັດທະນາເສດຖະກິດ - ສັງຄົມ,ແຜນງົບປະມານແຫ່ງລັດ ແລະ ການຈັດຕັ້ງປະຕິບັດວຽກງານປ້ອງກັນຊາດ - ປ້ອງກັນຄວາມສະຫງົບ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ,ຜ່ານຮ່າງລາຍງານການເມືອງ ກອງປະຊຸມໃຫຍ່ອົງຄະນະພັກແຂວງ ອຸດົມໄຊ ຄັ້ງທີ IX,ແຜນພັດທະນາເສດຖະກິດ - ສັງຄົມ 5 ປີ 2021 -2025. ນອກນັ້ນ ຍັງຍົກເອົາບາງບັນຫາ ຂຶ້ນມາເປັນຫົວຂໍ້ໃນການສຳມະນາ ເປັນຕົ້ນແມ່ນ ການປັບປຸງລະບົບການປົກຄອງທ້ອງຖິ່ນ - ຮາກຖານ,ການປະຕິຮູບຂອດການບໍລິການ ບໍລິຫານລັດ ທີ່ກົດຫນ່ວງຖ່ວງດຶງ ການດຳເນີນທຸລະກິດ ແລະ ບໍລິການປະຊາຊົນ ແລະ ຈຸດພິເສດດ້ານທີ່ຕັ້ງ ແລະ ນະໂຍບາຍເຊື່ອມຈອດ - ເຊື່ອມໂຍງເສດຖະກິດ ຂອງສປປລາວ. ຈາກນັ້ນ ຜູ້ແທນກອງປະຊຸມ ໄດ້ພ້ອມກັນຕີລາຄາ,ປະ ກອບຄຳເຫັນ ໃສ່ແຕ່ລະບັນຫາ ເພື່ອເປັນບ່ອນອີງໃນການປັບປຸງແກ້ໄຂວຽກງານ ໃຫ້ມີຄວາມຖືກ ຕ້ອງ,ຊັດເຈນ,ມີປະສິດທິພາບ ແລະ ສາມາດຈັດຕັ້ງປະຕິບັດໄດ້ຢ່າງມີຜົນສຳເລັດ ເຊິ່ງບັນຫາສຳ ຄັນ ແມ່ນເນັ້ນໃສ່ວຽກງານແຜນພັດທະນາເສດຖະກິດ - ສັງຄົມ ແລະ ແຜນງົບປະມານແຫ່ງລັດ ເນື່ອງຈາກໄລຍະຜ່ານມາ ແມ່ນພົບກັບບັນຫາທ້າທາຍຫລາຍດ້ານ ເປັນຕົ້ນແມ່ນ ພະຍາໂຄວິດ 19 ເຊິ່ງເຮັດໃຫ້ການເຄື່ອນໄຫວວຽກງານ ທຸກດ້ານ ບໍ່ໄປຕາມແຜນການ,ການຈັດເກັບລາຍຮັບ ກໍບໍ່ໄດ້ຕາມຄາດຫມາຍ. ດັ່ງນັ້ນ ກອງປະຊຸມ ຈຶ່ງພ້ອມກັນ ວາງຄາດຫມາຍສູ້ຊົນ ເຄື່ອນໄຫວໃນ 6 ເດືອນທ້າຍປີນີ້ ເຮັດໃຫ້ແຂວງອຸດົມໄຊ ມີສະຖຽນລະພາບ ທາງດ້ານການເມືອງ,ເສດຖະກິດຂະ ຫຍາຍຕົວຢ່າງຕໍ່ເນື່ອງ,ພັດທະນາຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ.