ກອງປະຊຸມໃຫ່ຍຜູ້ແທນອົງຄະນະພັກ ເມືອງແບງ ຄັ້ງທີ XII ພາຍຫຼັງດຳເນີນມາເປັນເວລາ 2 ວັນເຕັມ ກໍໄດ້ສໍາເລັດລົງ ໃນຕອນບ່າຍວັນທີ 22 ພະຈິກ 2019 ທີ່ສະໂມສອນຂອງເມືອງແບງ ດ້ວຍບັນຍາ ກາດອັນຟົດຟື້ນ ແລະ ມີຄວາມຮັບຜິດຊອບສູງ ຂອງບັນດາຜູ້ແທນກອງປະຊຸມ ເຮັດໃຫ້ມີຜົນສຳເລັດອັນຈົບງາມ

ຕາມຈຸດປະສົງ, ຄາດໝາຍທີ່ວາງໄວ້ ໂດຍພາຍໃຕ້ການເປັນປະທານຂອງສະຫາຍ ບຸນເທີມ ເຕີຍມະນີ ກຳມະການພັກແຂວງ ເລຂາພັກເມືອງ ເຈົ້າເມືອງ ເມືອງແບງ, ເຂົ້າຮ່ວມມີສະຫາຍ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງອຸດົມໄຊ, ມີຄະນະປະຈຳພັກແຂວງ, ກຳມະການພັກແຂວງ, ອາດີດການນຳເມືອງ, ພະນັກງານປະຕິວັດອາວຸໂສ, ຜູ້ຊົງຄຸນວຸດທິ, ພ້ອມດ້ວຍ ແຂກຖືກເຊີນຈາກຂັ້ນແຂວງ, ເມືອງໃກ້ຄຽງ ແລະ ບັນດາສະຫາຍຜູ້ແທນສົມບູນ 128 ສະຫຍ, ຍິງ 5 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກ ໃນທົ່ວທຸກຂົງເຂດວຽກງານຈຳນວນ 2.016 ສະຫາຍເຂົ້າຮ່ວມຢ່າງພ້ອມພຽງ.

ຕະຫຼອດໄລຍະກອງປະຊຸມໃຫ່ຍ ບັນດາສະຫາຍຜູ້ແທນທີ່ເຂົ້າຮ່ວມ ລ້ວນແຕ່ໄດ້ເຊີດຊູຄວາມຮັບຜິດຊອບຂອງຕົນ, ເປີດກວ້າງປະຊາທິປະໄຕ, ສຸມສະຕິປັນຍາ ຄົ້ນຄວ້າປະກອບຄຳຄິດຄຳເຫັນ ແລະ ໄດ້ຕົກລົງຮັບຮອງເອົາບົດລາຍງານການເມືອງ, ແຜນພັດທະນາເສດຖະກິດ-ສັງຄົມຂອງຄະນະບໍລິຫານງານພັກເມືອງ ໂດຍເປັນເອກະສັນຢ່າງສົມບູນ ຕໍ່ທັດສະນະການຕີລາຄາສະພາບການຈັດຕັ້ງປະຕິບັດ ມະຕິກອງປະຊຸມໃຫ່ຍຄັ້ງທີ່ XI ຂອງອົງຄະນະພັກເມືອງແບງ ແລະ ຖອດຖອນໄດ້ຈາກພຶດຕິກຳຕົວຈິງຈຳນວນໜຶ່ງ ຕະຫຼອດໄລຍະ 5 ປີ ຜ່ານມາ.
ພ້ອມນັ້ນ ກໍໄດ້ເຫັນພ້ອມ ແລະ ເປັນເອກະສັນກັນ ຮັບຮອງແຜນພັດທະນາເສດຖະກິດ-ສັງຄົມ 5 ປີ ຕໍ່ໜ້າ ແຕ່ປີ 2020-2024. ໃນກອງປະຊຸມໄດ້ສຳຫຼວດຕີລາຄາການເຄື່ອນໄຫວ ຊີ້ນຳໆພາ ຂອງຄະນະບໍລິຫານງານພັກເມືອງ ຊຸດທີ XI ເຊິ່ງໄດ້ເສີມຂະຫຍາຍມູນເຊຶື້ອຄວາມສາມັກຄີເປັນປຶກແຜ່ນແໜ້ນໜາ ມີຄວາມເດັດດ່ຽວໜຽວແໜ້ນ ມີຄວາມຕັດສິນໃຈສູງ ຜ່ານຜ່າຄວາມຫຍຸ້ງຍາກ ນາໆປະການ ນໍາພາປະຊາຊົນບັນດາເຜົ່າພາຍໃນເມືອງແບງ ເດີນຕາມແນວທາງນະໂຍບາຍຂອງພັກ ແລະ ບັນລຸຜົນສໍາເລັດຫຼາຍດ້ານ.

ກອງປະຊຸມໃຫ່ຍຄັ້ງນີ້ບັນດາຜູ້ແທນສົມບູນໃຊ້ສິດປະຊາທິປະໄຕຂອງຕົນປ່ອນບັດເລືອກເອົາຄະນະບໍລິຫານງານພັກເມືອງຊຸດທີ່ XII ຈຳນວນ 25 ສະຫາຍ, ຍິງ 3 ສະຫາຍ ຊຶ່ງປະກອບດ້ວຍບັນດາສະຫາຍ ທີ່ໄດ້ຜ່ານການທົດສອບຢູ່ໃນຂະບວນການວຽກງານຕົວຈິງ ໃນໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ, ແມ່ນຜູ້ທີ່ມີມານະຈິດບຸກບືນປະຕິວັດ ແລະ ມີຄວາມໜັກແໜ້ນທາງດ້ານການເມືອງ ມີປະສົບການໃນການນຳພາ ແມ່ນຜູ້ທີ່ໄດ້ຕັ້ງໜ້າຫ້າວຫັນຢູ່ໃນຂະບວນການ ແລະ ໄດ້ຮັບຄວາມໄວ້ວາງໃຈຈາກມະຫາຊົນຢ່າງແທ້ຈິງ. ກອງປະຊຸມປະຖົມມະລຶກຍັງໄດ້ປ່ອນບັດຄັດເລືອກເອົາຄະນະປະຈຳພັກເມືອງຈຳນວນ 7 ສະຫາຍ ເລືອກເອົາເລຂາ ຮອງເລຂາ ປະທານກວດກາ ແລະ ຮອງປະທານກວດກາ ໃນນັ້ນໄດ້ເລືອກເອົາສະຫາຍ ສົມຄິດ ກັນສະໜິດ ເປັນເລຂາຄະນະບໍລິຫານງານພັກ ເມືອງແບງ ສະໄໝທີXII, ເລືອກເອົາສະຫາຍ ຄໍາພອນ ພິມມະລາດ ແລະສະຫາຍ ຄໍາຈັນ ວາບົວແສງ ເປັນຮອງເລຂາ ແລະ ເລືອກເອົາສະຫາຍ ຄຳພອນ ພິມມະລາດ ເປັນປະທານກວດກາ, ສະຫາຍ ສູນທອນ ຈັນທະເກດ ແລະສະຫາຍ ວາລີ ນາຈ່າ ເປັນຮອງປະທານກວດກາຄະນະບໍລິຫານງານພັກເມືອງແບງ ສະໄໝທີ XII, ກອງປະຊຸມຍັງໄດ້ປ່ອນບັດເລືອກເອົາຜູ້ແທນສົມບູນ-ສຳຮອງເພື່ອໄປຮ່ວມກອງປະຊຸມໃຫ່ຍຂອງອົງຄະນະພັກແຂວງຈຳນວນ 23 ສະຫາຍ, ໃນນັ້ນສົມບູນ 20 ສະຫາຍ ແລະ ສໍາຮອງ 3 ສະຫາຍ.
ກອງປະຊຸມໃຫຍ່ຄັ້ງນີ້ໄດ້ຮັບຟັງການໂອ້ລົມ, ຊີ້ນຳຂອງ ສະ ຫາຍ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາຄະນະບໍລິຫານງານພັກແຂວງ, ເຈົ້າແຂວງ​ອຸດົມໄຊ ເຊີ່ງໄດສະແດງຄວາມຍ້ອງຍໍຊົມເຊີຍຕໍ່ຜົນງານຂອງການຊີ້ນຳ ນຳພາຂອງຄະນະບໍລິຫານງານພັກເມືອງ ສະໃໝ່ທີ XI ແລະ ຊົມເຊີຍຕໍ່ຜົນສຳເລັດຂອງການດຳເນີນກອງປະຊຸມໃຫ່ຍຄັ້ງທີ XII ຂອງຜູ້ແທນອົງຄະນະພັກເມືອງແບງ ພ້ອມດຽວກັນນີ້ກໍໄດ້ໃຫ້ທິດຊີ້ນຳ ການຈັດຕັ້ງປະຕິບັດໜ້າທີ່ໃນຕໍ່ໜ້າ ໂດຍສະເພາະແມ່ນການຈັດຕັ້ງປະຕິບັດ ມະຕິກອງປະຊຸມໃຫ່ຍ ຄັ້ງທີ XII ຂອງຜູ້ແທນອົງຄະນະພັກເມືອງແບງ ໃຫ້ໄດ້ຮັບຜົນສຳເລັດ ຕາມຄາດໝາຍທີ່ວາງໄວ້.