ເນື່ອງໃນໂອກາດສະເຫຼີມສະຫຼອງວັນຊາດ ທີ 2 ທັນວາ ຄົບຮອບ 44 ປີ ( 2 ທັນວາ 1975 – 2 ທັນວາ 2019 ) ແລະ ວັນຄ້າຍວັນເກີດຂອງປະທານໄກສອນ ພົມວິຫານ

ຄົບຮອບ 99 ປີ ( 13 ທັນວາ 1920 – 13 ທັນວາ 2019 ) ທີ່ຫມູນວຽນມາອີກວາລະໜຶ່ງ ໃນວັນທີ 2 ທັນວາ ນີ້ ການນຳແຂວງອຸດົມໄຊ ໄດ້ເຂົ້າຮ່ວມວາງກະຕ່າດອກໄມ້ ຢູ່ທີ່ອານຸສອນສະຖານ ປະທານໄກສອນພົມວິຫານ. ໃຫ້ກຽດນຳໂດຍທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ,ເລຂາພັກແຂວງ,ເຈົ້າແຂວງອຸດົມໄຊ,ມີຄະນະປະຈຳພັກແຂວງ – ຮອງເຈົ້າແຂວງ,ກຳລັງປ້ອງກັນຊາດ – ປ້ອງກັນຄວາມສະຫງົບ,ກຳລັງປົກປ້ອງກົດຫມາຍ,ກຸ່ມເສດຖະກິດ,ວັດທະນະທຳ – ສັງຄົມ ແລະ ເມືອງໄຊ ເຂົ້າຮ່ວມ.

 ການວາງພວງມາລາ ແລະ ກະຕ່າດອກໄມ້ໃນຄັ້ງນີ້ ເພື່ອສະແດງເຖິງຄວາມກະຕັນຍູ,ຮູ້ບຸນຄຸນ ເຖິງຄຸນງາມຄວາມດີ,ນ້ຳໃຈຕໍ່ສູ້ເດັດດ່ຽວ ຢ່າງພິລະອາດຫານ ແລະ ບໍ່ຍອມຈຳນົນຂອງບັນພະບູລຸດລາວ ກໍຄືບັນດານັກຮົບປະຕິວັດ ທີ່ໄດ້ເສຍສະຫຼະເລືອດເນື້ອ ເພື່ອປະເທດຊາດ ແລະ ປະຊາຊົນຢ່າງອົງອາດກ້າຫານ ເຊິ່ງຄຸນງາມຄວາມດີ ແລະ ຜົນງານອັນໃຫຍ່ຫຼວງດັ່ງກ່າວ ແມ່ນໄດ້ຖືກຈາລຶກໄວ້ໃນປະຫວັດສາດ ແລະ ຊີວິດຈິດໃຈຂອງທົ່ວປວງຊົນລາວທັງຊາດຕະຫຼອດກາລະນານ.

 

ແລະ ພ້ອມທີ່ຈະນຳເອົາບົດຮຽນ ຄຸນງາມຄວາມດີ,ຄຸນສົມບັດສິນທໍາປະຕິວັດ,ແບບຢ່າງທີ່ຫາຍາກ ມານຳໃຊ້ເຂົ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະ ເທດຊາດ ໃຫ້ເກີດດອກອອກຜົນ.