ກອງປະຊຸມ ສະຫຼຸບວຽກງານຈັດຕັ້ງ ກໍ່ສ້າງພັກ-ພະນັກງານ ທົ່ວແຂວງອຸດົມໄຊ ປະຈຳປີ 2019 ໄດ້ໄຂຂຶ້ນໃນທີ່ຫ້ອງປະຊຸມ ຫ້ອງວ່າການແຂວງອຸດົມໄຊ ໃນວັນທີ 20 ກຸມພານີ້ ໂດຍການເຂົ້າຮ່ວມເປັນປະທານຂອງທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງອຸດົມໄຊ, ເຂົ້າຮ່ວມມີຮອງເລຂາພັກແຂວງ ຄະນະປະຈຳພັກແຂວງ ກຳມະການພັກແຂວງ, ຫົວໜ້າ ຮອງຫົວໜ້າພະແນກການ ອົງການ ສອງກອງບັນຊາການທະຫານ ຕຳຫຼວດ, ເລຂາພັກເມືອງ ເຈົ້າເມືອງ ຫົວໜ້າຄະນະຈັດຕັ້ງເມືອງ 7 ເມືອງ ແລະ ພະນັກງານທີ່ເຮັດວຽກງານຈັດຕັ້ງຈາກແຕ່ລະຂົງເຂດເຂົ້າຮ່ວມ.

    

  ໃນກອງປະຊຸມຜູ້ແທນກອງປະຊຸມແມ່ນໄດ້ຕີລາຄາການຈັດຕັ້ງປະຕິບັດວຽກງານຈັດຕັ້ງ ກໍ່ສ້າງພັກ-ພະນັກງານ ທົ່ວແຂວງປະຈຳປີ 2019 ທີ່ຄະນະພັກ ຄະນະຈັດຕັ້ງແຂວງ ກໍຄືຄະນະພັກ ຄະນະນຳແຕ່ລະຂັ້ນ ແລະ ພະນັກງານຜູ້ທີ່ຮັບຜິດຊອບວຽກງານຈັດຕັ້ງ ກໍ່ສ້າງພັກ-ພະນັກງານ ໃນຂອບເຂດທົ່ວແຂວງ ໄດ້ພ້ອມກັນສູ້ຊົນຈັດຕັ້ງປະຕິບັດ ສະແດງອອກໃນໜື່ງປີຜ່ານມາ ຄະນະພັກແຕ່ລະຂັ້ນໄດ້ຖືເອົາການສຶກສາອົບຮົມການເມືອງ-ແນວຄິດ ເຮັດໃຫ້ພະນັກງານສະມາຊິກພັກ ແລະ ປະຊາຊົນບັນດາເຜົ່າມີທັດສະນະຫຼັກໝັ້ນການເມືອງໜັກແໜ້ນ ເຊື່ອໝັ້ນຕໍ່ອຸດົມການຂອງພັກ ມີການຫັນປ່ຽນຢ່າງຕັ້ງໜ້າ ມີຄວາມຮູ້ ຄວາມເຂົ້າໃຈ ແລະ ເປັນເຈົ້າການເຂົ້າຮ່ວມໃນການຈັດຕັ້ງປະຕິບັດແນວທາງນະໂຍບາຍຂອງພັກ-ລັດ ມີຜົນສຳເລັດໃນຫຼາຍດ້ານ ປັບປຸງກໍ່ສ້າງພັກມີຄວາມໜັກແໜ້ນ ເຂັ້ມແຂງ ມີການຂະຫຍາຍຕົວທາງດ້ານປະລິມານ ແລະ ຄຸນນະພາບ ສະແດງອອກມີຮາກຖານພັກເພີ່ມຂຶ້ນ 76 ຮາກຖານ ມາຮອດປັດຈຸບັນໃນທົ່ວແຂວງ ມີການຈັດຕັ້ງຮາກຖານພັກທັງໝົດ 1.128 ຮາກຖານ ມີໜ່ວຍພັກທີ່ໄດ້ຮັບການຮັບຮອງເປັນໜ່ວຍພັກ ປອດໃສ ເຂັ້ມແຂງ ໜັກແໜ້ນປະຈຳປີ 2019 ທັງໝົດ 497 ໜ່ວຍພັກ ທີ່ພົ້ນເດັ່ນແມ່ນໄດ້ລົງເຄື່ອນໄຫວຊຸກຍູ້ການດໍາເນີນກອງປະຊຸມໃຫ່ຍຂອງພັກໃນທົ່ວແຂວງ ແລະ ສຳເລັດການຈັດຕັ້ງດຳເນີນກອງປະຊຸໃຫ່ຍ ອົງຄະນະພັກເມືອງ 7 ເມືອງ ແລະ ກອງບັນຊາການ ປກຊ ປກສ ແຂວງ ເປັນເງື່ອນໄຂໃຫ້ແກ່ການກະກຽມກອງປະຊຸມໃຫ່ຍຄັ້ງທີ 9 ຂອງອົງຄະນະພັກແຂວງ. ພ້ອມດຽວກັນນີ້ກໍໄດ້ຍົກໃຫ້ຮູ້ດ້ານອ່ອນຂໍ້ຄົງຄ້າງ ແລະ ທິດທາງໜ້າທີ່ ວຽກງານຈັດຕັ້ງ ກໍ່ສ້າງພັກ-ພະນັກງານ ປີ 2020 ໃນນັ້ນຜູ້ເຂົ້າຮ່ວມຈະໄດ້ພ້ອມກັນປະກອບຄຳຄິດຄຳເຫັນ ເພື່ອສືບຕໍ່ປັບປຸງວຽກງານພະນັກງານໃຫ້ເຂົ້າສູ່ຄຸນນະພາບໃໝ່ ມີຄວາມສອດຄອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນແຕ່ລະໄລຍະ. ໃນກອງປະຊຸມຍັງໄດ້ເຜີຍແຜ່ເອກະສານທີ່ສຳຄັນອີກຈຳນວນໜື່ງ.