ວັນທີ 10 ທັນວາ ຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມວິຫານ ໄດ້ຈັດກອງປະຊຸມ ເຜີຍແຜ່ມະຕິ ຂອງກົມການເມືອງສູນກາງພັກ ວ່າດ້ວຍການຄົ້ນຄວ້າແນວຄິດ ໄກສອນ ພົມວິຫານ ໃຫ້ແກ່ພະນັກງານຫຼັກແຫຼ່ງ 8 ແຂວງພາກເໜືອຂຶ້ນຢູ່ທີ່ສະໂມສອນໃຫຍ່ຂອງແຂວອຸດົມໄຊ ໂດຍພາຍໃຕ້ການເປັນປະທານຮ່ວມຂອງ ທ່ານ ສົມສະຫວາດ ເລັ່ງສະຫວັດ ອາດີດກໍາມະການກົມການເມືອງສູນກາງພັກ, ທີ່ປຶກສາຄະນະບໍລິຫານງານສູນກາງພັກສະໄໝ ທີ X

ຜູ້ຊີ້ນຳວຽກງານຄົ້ນຄວ້າແນວຄິດ ໄກສອນ ພົມວິຫານ ທັງເປັນທີ່ປຶກສາຂອງຄະນະຮັບຜິດຊອບສູນຄົ້ນຄວ້າແນວຄິດ ໄກສອນ ພົມວິຫານ, ທ່ານ ຮສ ພູວົງ ອຸ່ນຄຳແສນ ຮັກສາການ ເລຂາຄະນະບໍລິຫານງານພັກ, ຮັກສາການຫົວໜ້າສະຖາບັນການເມືອງ ແລະການປົກຄອງແຫ່ງຊາດ, ຮອງຫົວໜ້າຜູ້ປະຈໍາການຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມວິຫານ, ທ່ານ ຄໍາພັນ ເຜີຍຍະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ແຂວງອຸດົມໄຊ. ມີບັນດາທ່ານຮອງເລຂາພັກແຂວງ, ຄະນະປະຈຳພັກແຂວງ ຈາກ ແຂວງອຸດົມໄຊ, ບໍ່ແກ້ວ, ຫຼວງນໍ້າທາ, ຜົ່ງສາລີ, ຫົວພັນ, ຊຽງຂວາງ, ໄຊຍະບູລີ ແລະ ແຂວງຫຼວງພະບາງ ພ້ອມດ້ວຍພະນັກງານຫຼັກແຫຼ່ງ, ພະນັກງານຄູອາຈານ ແລະນັກສຶກສາໂຮງຮຽນການເມືອງ-ການປົກຄອງແຂວງອຸດົມໄຊ ເຂົ້າຮ່ວມ.


ຈຸດປະສົງໃນການຈັດຕັ້ງກອງປະຊຸມໃນຄັ້ງນີ້ ແມ່ນເພື່ອເປັນການເຜີຍແຜ່ເອກະສານທີ່ພົວພັນເຖິງວຽກງານຄົ້ນຄວ້າແນວຄິດ ໄກສອນ ພົມວິຫານ ເຊິ່ງລວມມີ ມະຕິຂອງກົມການເມືອງສູນກາງພັກ ສະບັບເລກທີ 058/ກມສພ, ລົງວັນທີ 13 ທັນວາ 2018 ວ່າດ້ວຍການຄົ້ນຄວ້າແນວຄິດ ໄກສອນ ພົມວິຫານ, ມະຕິຂອງກົມການເມືອງສູນກາງພັກ ສະບັບເລກທີ 063/ກມສພ, ລົງວັນທີ 12 ມີນາ 2019 ວ່າດ້ວຍການແຕ່ງຕັ້ງຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມວິຫານ, ບົດແນະນຳໃນການຈັດຕັ້ງປະຕິບັດມະຕິຂອງກົມການເມືອງສູນກາງພັກ ວ່າດ້ວຍການຄົ້ນຄວ້າແນວຄິດ ໄກສອນ ພົມວິຫານ ແລະ ແຜນການຄົ້ນຄວ້າແນວຄິດ ໄກສອນ ພົມວິຫານ ແຕ່ນີ້ຮອດປີ 2020. ພ້ອມນີ້ຍັງໄດ້ຈັດຝຶກອົບຮົມວິທີວິທະຍາກ່ຽວກັບການຄົ້ນຄວ້າແນວຄິດ ໄກສອນ ພົມວິຫານ, ວິທີເກັບກໍາເອກະສານກ່ຽວກັບປະທານ ໄກສອນ ພົມວິຫານຕື່ມອີກ.