ວັນທີ 3 ກຸມພານີ້ ທ່ານ ຄຳພຽງ ຢາຈົງວາ ຮອງເລຂາພັກແຂວງ ຮອງເຈົ້າແຂວງອຸດົມໄຊ ໄດ້ຕ້ອນຮັບການເຂົ້າຢ້ຽມຄຳນັບ ຂອງທ່ານ ດໍາຣົງ ໄຄ່ຄວນ ເອກອັກຄະລັດຖະທູດແຫ່ງ ຣາຊະອານາຈັກໄທ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ແຂວງອຸດົມໄຊ

ໃນໂອກາດນີ້ ທ່ານຮອງເຈົ້າແຂວງ ແຂວງອຸດົມໄຊ ກໍໄດ້ລາຍງານສະພາບລວມຂອງແຂວງ, ທີ່ຕັ້ງ, ຈຸດພິເສດ ແລະ ທ່າແຮງທີ່ສຳຄັນຂອງແຂວງ ໃຫ້ທ່ານທູດຊາບ ພ້ອມທັງໄດ້ໃຫ້ຮູ້ກ່ຽວກັບສະພາບການພັດທະນາ ເສດຖະກິດ - ສັງຄົມ ແລະ ສະພາບການເຄື່ອນໄຫວພົວພັນການຄ້າ, ການລົງທຶນ ແລະ ການຊ່ວຍເຫຼືອຂອງຣາຊະອານາຈັກໄທ ທີ່ໄດ້ມີການພັວພັນຄ້າຂາຍ ແລະ ອູມຊູຊ່ວຍເຫຼືອແຂວງອຸດົມໄຊໃນໄລຍະຜ່ານມາ  ນອກຈາກນີ້ທ່ານຮອງເຈົ້າແຂວງ ຍັງໄດ້ໃຫ້ຮູ້ກ່ຽວກັບທິດທາງ, ແຜນການຈຸດສຸມ ຂອງແຂວງອຸດົມໄຊ ທີ່ຈະໄດ້ສຸມໃສ່ໃນການພັດທະນາ ເພື່ອສ້າງໃຫ້ແຂວງອຸດົມໄຊໄປຕາມທິດ 4 ໃຈກາງໃນການພັດທະນາ ທີ່ຄະນະພັກອົງການປົກຄອງແຂວງໄດ້ກຳນົດໄວ້  ໂອກາດນີ້ທ່ານກໍໄດ້ສະເໜີຕໍ່ທ່ານທູດໃຫ້ສືບຕໍ່ໃນການອູມຊູຊ່ວຍເຫຼືອ ຊຸກຍູ້ສົ່ງເສີ່ມໃຫ້ມີການພົວພັນການຄ້າ ການລົງທຶນໃຫ້ນັບມືນັບຫຼາຍຂຶ້ນ ໂອກາດດຽວກັນກໍໄດ້ມີການປຶກສາຫາລືສົນທະນາກັນໃນປະເດັນຕ່າງໆຢ່າງກົງໄປກົງມາ.

ໃນໂອກາດທີ່ທ່ານເອກອັກຄະລັດຖະທູດ ໄດ້ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອຸດົມໄຊຄັ້ງນີ້ ທ່ານພ້ອມດ້ວຍຄະນະກໍໄດ້ລົງເຄື່ອນໄຫວເບີ່ງພື້ນຖານໂຄງລ່າງການພັດທະນາຂອງແຂວງ, ສະຖານທີ່ທ່ອງທ່ຽວ, ສຳນັກງານຫ້ອງການ, ໂຮງຮຽນ ໂຮງໝໍ ແລະ ພື້ນທີ່ການສຳຫຼວດເພື່ອການພັດທະນາຂອງນັກທຸລະກິດ ຈາກຣາຊະອານາຈັກໄທ ທີ່ໄດ້ມາເຄື່ອນໄຫວສຳຫຼວດຄວາມເປັນໄປໄດ້ ໃນການພັດທະນາຕົວເມືອງທັນສະໄໝ ຢູ່ເມືອງນາໝໍ້.